rgya gar skad du/_bi na ya bstu/_bod skad du/_'dul ba gzhi/
bam po dang po/_dkon mchog gsum la phyag 'tshal lo/_/gang gis 'ching rnams yang 
dag rab bcad cing /_/mu stegs tshogs rnams thams cad rab bcom ste/_/sde dang bcas 
pa'i bdud rnams nges bcom nas/_/byang chub 'di brnyes de la phyag 'tshal lo/_/khyim don che 
chung spangs te dang po rab 'byung dka'/_/rab byung thob nas yul spyad dag gis dga' thob dka'/_/
mngon dga' ji bzhin don bskyed yang dag byed pa dka'/_/ngur smrig gos 'chang mkhas pa tshul 
las nyams pa dka'/_/gzhi rnams kyi spyi sdom la/_rab 'byung gso sbyong gzhi dang ni/_/
dgag dbye dbyar dang ko lpags gzhi/_/sman dang gos dang sra brkyang dang /_/kau sham bi dang las kyi gzhi/_/dmar ser can dang gang zag dang /_/spo dang gso sbyong bzhag pa dang /_/gnas 
mal dang ni rtsod pa dang /_/dge 'dun dbyen rnams bsdus pa yin/_/rab tu byung ba'i spyi sdom la/_shA ri'i bu dang mu stegs can/_/dge tshul gnyis dang bya rog skrod/_/dgra bcom bsad dang 
lag rdum gyi/_/sde tshan yang dag bsdus pa yin/_/sdom la shA ri'i bu dang rab 'byung dang /_/bsnyen par rdzogs par gnang ba dang /_/nye sdes tshogs ni bsdus pa dang /_/lnga pa'i sde tshan bsdus 
pa yin/_/byang chub sems dpa' dga' ldan gyi gnas na bzhugs pa na/_yul ang ga dag na ang ga'i rgyal po zhes bya bas rgyal srid 'byor pa rgyas pa bde ba lo legs pa skye bo dang mi mang pos 
gang ba byed du bcug go/_//yul ma ga d+ha dag na yang rgyal po pad ma chen po zhes bya bas/_rgyal srid 'byor pa rgyas pa bde ba lo legs pa skye bo dang mi mang pos gang ba byed du bcug go/
res 'ga' ni ang ga'i rgyal po dpung dang mthu che ba yin la/_res 'ga' ni rgyal po pad ma chen po dpung dang mthu che ba yin no/_/gang gi tshe ang ga'i rgyal po dpung dang mthu che ba de'i tshe na/
des dpung gi tshogs yan lag bzhi pa/_glang po che pa'i tshogs dang /_rta pa'i tshogs dang /_shing rta pa'i tshogs dang /_dpung bu chung gi tshogs go bskon te/_yul ma ga d+ha rgyal po'i 
khab ma gtogs pa bcom nas phyir ldog par byed do/_/gang gi tshe rgyal po pad ma chen po dpung dang mthu che ba de'i tshe na/_des kyang dpung gi tshogs yan lag bzhi pa/_glang po che pa'i 
tshogs dang /_rta pa'i tshogs dang /_shing rta pa'i tshogs dang /_dpung bu chung gi tshogs go bskon te/_yul ang ga tsam pa ma gtogs pa bcom nas phyir ldog par byed do/_/de nas dus gzhan zhig na ang 
ga'i rgyal po dpung dang mthu che bar gyur nas des dpung gi tshogs yan lag bzhi pa glang po che pa'i tshogs dang /_rta pa'i tshogs dang /_shing rta pa'i tshogs dang /_dpung bu chung gi tshogs go bskon te yul ma 
ga d+ha gzhom par brtsams pa dang /_ma ga d+ha na gnas pa'i skye bo'i tshogs kyis rgyal po pad ma chen po la lha ang ga'i rgyal pos dpung gi tshogs yan lag bzhi pa glang po che pa'i tshogs dang /
rta pa'i tshogs dang /_shing rta pa'i tshogs dang /_dpung bu chung gi tshogs go bskon te yul ma ga d+ha 'joms par bgyid do zhes sbron pa dag btang ngo /_/rgyal po pad ma chen pos kyang thos nas dpung gi 
tshogs yan lag bzhi pa glang po che pa'i tshogs dang /_rta pa'i tshogs dang /_shing rta pa'i tshogs dang /_dpung bu chung gi tshogs go bskon te ang ga'i rgyal po dang g.yul sprad pa'i phyir 'phags so/_/
de nas ang ga'i rgyal pos rgyal po pad ma chen po'i glang po che'i tshogs thams cad phrogs shing /_rta pa'i tshogs dang /_shing rta pa'i tshogs dang /_dpung bu chung gi tshogs thams cad kyang phrogs so/_/
rgyal po pad ma chen po yang pham pa dang /_skrag pa dang /_bcom pa dang /_gzhan rgyal ba dang /_rgyab kyis phyogs par byas te/_rgyal po'i khab tu zhugs nas sgo bcad de/_ra ba dag gi khar sbrengs nas 
'dug go_ang ga'i rgyal pos rgyal po pad ma chen po la pho nya btang ste/_gal te phyir 'byung na de lta na legs/_gal te phyir mi 'byung na ji ste steng gi nam mkha' la 'gro na ni mda' brgyud pas 
khyod ltung bar bya'o/_/ji ste sa'i 'og tu 'gro na ni mchil pa dang drang ba'i tshul gyis drang bar bya'o/_/ji ste ri'i rtse mor 'dzeg na ni der yang khyod thar pa med do zhes spring ngo /_/rgyal po pad ma 
chen pos phrin yig glags nas de mi bde bar gyur te/_lag pa la 'gram pa gtad nas sems khong su chud cing 'dug 'dug nas des blon po rnams la smras pa/_shes ldan dag ang ga'i rgyal po 
'di ni gdug pa/_pha rol gnon pa/_dpung dang mthu che bar gyur la/_des yu bu cag la 'di dang 'di skad ces spring na/_de la yu bu cag gis ji ltar bsgrub par bya/_de dag gis tshigs su bcad pa 
smras pa/_yul dang srog la gnod gyur na/_/skyes bus kun du srog bsrung bya/_/blo yis gnyis ka dpyad byas na/_/yul ni yang rnyed srog rnams min/_/lha rnam pa thams cad du slar 
'byung bar bgyi'o/_/de ral gri mgul du thogs te phyir byung ba dang /_ang ga'i rgyal pos de la lo thang dang bca' phab ste de nyid du bzhag go_/gang gi tshe bcom ldan 'das byang chub sems 
dpa' dga' ldan gyi gnas na bzhugs pas gzigs pa lnga po dag la gzigs nas 'dod pa na spyod pa'i lha drug po dag la lan gsum bsgo ba mdzad de/_glang po che ltar snang bar bsgyur te/
yum gyi lhums su zhugs pa de'i tshe na sa chen po shin tu g.yos par gyur cing 'jig rten 'di thams cad kyang sum bcu rtsa gsum pa'i lha rnams kyi kha dog gi mthu bas lhag pa'i snang ba rgya chen pos khyab 
par gyur cing /_'jig rten gyi 'jig rten gyi bar gang na nyi ma dang zla ba 'di ltar rdzu 'phrul che ba/_'di ltar mthu che ba 'di gnyis kyi 'od dag nyams su mi myong ba'i mun pa mun gnag mun par byed 
pas/_gnag par gyur pa gang dag yin pa de dag kyang de'i tshe na snang ba rgya chen pos khyab par gyur nas/_sems can gang dag der skyes pa dag gis rang gi lag pa brkyang ba yang mi mthong ba de dag gis 
kyang 'od des sems can gcig gis gcig mthong nas shes ldan dag sems can gzhan yang 'dir skyes so/_/shes ldan dag sems can gzhan yang 'dir skyes so zhes shes par gyur to/_/gang gi tshe 
bcom ldan 'das byang chub sems dpa' bltams pa de'i tshe na grong khyer chen po bzhi po dag tu rgyal po chen po bzhi dag gi bu yang btsas par gyur te/_rgyal po'i khab tu rgyal po pad ma chen po'i bu btsas so/_/
mnyan yod du ni rgyal po rtsibs kyis 'phur tshangs byin gyi bu btsas so/_/'phags rgyal du ni rgyal po mu khyud mtha' yas kyi bu btsas so/_/kau sham bir ni rgyal po dmag brgya pa'i bu btsas so/_/bcom ldan 
'das byang chub sems dpa' bltam pa na 'jig rten thams cad sum bcu rtsa gsum pa'i lha rnams kyi kha dog gi mthu bas lhag pa'i snang ba rgya chen pos khyab par gyur cing 'jig rten gyi 'jig rten gyi bar 
gang na nyi ma dang zla ba 'di ltar rdzu 'phrul che ba/_'di ltar mthu che ba 'di gnyis kyi 'od dag nyams su mi myong ba'i mun pa mun gnag mun par byed pas gnag par gyur pa gang dag yin pa de dag kyang de'i tshe na 
snang ba rgya chen pos khyab par gyur nas/_sems can gang dag der skyes pa dag gis rang gi lag pa brkyang ba yang mi mthong ba de dag gis kyang 'od des sems can gcig gis gcig mthong nas shes ldan dag 
sems can gzhan yang 'dir skyes so/_/shes ldan dag sems can gzhan yang 'dir skyes so zhes shes par gyur to/_/rgyal po pad ma chen pos bsams pa/_bdag gi bu btsas pa na 'jig rten nyi ma'i 
gzugs shar ba ltar snang zhing 'di btsun mo gzugs can gyi bu yin pas gzhon nu 'di'i ming gzugs can snying por gdags so snyam nas bu de'i ming gzugs can snying po zhes bya bar btags 
so/_/rgyal po rtsibs kyis 'phur tshangs byin gyis bsams pa/_bdag gi bu btsas pa na 'jig rten gsal ba gsal ba ltar snang bas gzhon nu 'di'i ming gsal rgyal du gdags so snyam nas bu de'i 
ming gsal rgyal zhes bya bar btags so/_/rgyal po dmag brgya pas bsams pa/_bdag gi bu btsas pa na 'jig rten nyi ma shar ba ltar snang bar gyur pas gzhon nu 'di'i ming shar bar gdags so snyam 
nas bu de'i ming shar ba zhes bya bar btags so/_/rgyal po mu khyud mtha' yas kyis bsams pa/_bdag gi bu btsas pa na 'jig rten rab tu snang bas snang bar gyur pas gzhon nu 'di'i ming rab snang 
zhes bya bar gdags so snyam nas bu de'i ming rab snang zhes bya bar btags so/_/rgyal po re res bsams pa yang bdag gi bu 'di'i mthu yin no/_/bdag gi bu 'di'i mthu yin no snyam mod kyi/_de ni de lta 
ma yin te/_'di ltar de dag thams cad ni byang chub sems dpa'i mthu yin pa'i phyir ro/_/gang gi nyin mo gzhon nu gzugs can snying po btsas pa de nyid kyi nyin mo blon po lnga brgya dag gi bu lnga brgya yang 
btsas te/_de dag kyang rigs dang mthun par ming btags so/_/gzhon nu gzugs can snying po ma ma brgyad po pang na 'tsho ba'i ma ma gnyis dang /_nu ma snun pa'i ma ma gnyis dang /_dri ma 'phyi ba'i ma 
ma gnyis dang /_rtsen grogs kyi ma ma gnyis la rjes su gtad do/_/de ma ma brgyad po dag gis 'o ma dang /_zho dang /_mar dang /_zhun mar dang /_mar gyi snying khu dang /_gzhan yang yo byad kyi bye brag 
gtso bo gtso bo dag gis sring bar byed/_skyed par byed cing rdzing na gnas pa'i pad ma bzhin myur du skyed par byed do/_/de gang gi tshe chen por gyur pa de'i tshe yi ge dang /_grangs dang /_rtsis dang /_lag rtsis 
dang /_dbyung ba dang /_gzhag pa dang /_gzhag pa la nye bar zhugs nas/_de yi ge'i mthar phyin cing 'byed pa dang /_klog pa dang /_mkhas pa dang /_spyod pa gsal ba dang /_brtag pa brgyad po 'di lta 
ste/_rin po che brtag pa dang /_gzhi brtag pa dang /_gos brtag pa dang /_shing brtag pa dang /_glang po che brtag pa dang /_rta brtag pa dang /_bud med brtag pa dang /_skyes pa brtag pa la mkhas 
par gyur to/_/rgyal po rgyal rigs spyi bor dbang bskur ba ljongs kyi dbang phyug mthu dang brtson 'grus thob pa/_sa chen po'i dkyil 'khor mngon par rgyal bar byas te gnas pa rnams kyi bzo'i 
gnas dang /_las kyi gnas tha dad par gyur pa gang dag yin pa 'di lta ste/_glang po che'i gnyar bzhon pa dang /_rta bzhon pa dang /_shing rta'i thabs dang /_ral gri'i thabs dang /_'phong dang /_phyir bsnur 
ba dang /_mdun du bsnur ba dang /_lcags kyi bsgyur thabs dang /_zhags pa gdab pa dang /_mda' bo che 'phen thabs dang /_'dzin stangs dang /_gom stangs dang /_thor tshugs dang /_gcad pa dang /
dral ba dang /_dbug pa dang /_gnas lnga po 'di lta ste/_rgyang nas 'phog pa dang /_sgra grags par 'phog pa dang /_gnad du 'phog pa dang /_mi 'chor bar 'phog pa dang /_tshabs che ba de dag la yang 
zhugs shing byang bar gyur to/_/blon po'i bu lnga brgya po de dag kyang bzo'i gnas dang /_las kyi gnas dag la byang bar gyur to/_/de phas bzo sbyang ba bcwa brgyad po dag la bcug nas de'i ming 
bzo sbyangs gzugs can snying po/_/bzo sbyangs gzugs can snying po zhes bya bar gyur to/_/de nas dus gzhan zhig na gzhon nu gzugs can snying po glang po che la zhon te ljongs su byung ba 
dang /_des ang ga'i rgyal po'i zho shas 'tsho ba dag lo thang dang dpya sdud pa mthong nas/_des smras pa/_shes ldan dag lo thang dang dpya sdud pa 'di dag su'i yin/_de dag gis smras pa/_lha ang ga'i 
rgyal po'i lags so/_/des smras pa/_ci yu bu cag de la lo thang 'bul ba yin nam/_de dag gis smras pa/_lha lo thang 'bul ba lags so/_/des smras pa/_shes ldan dag zho shas 'tsho ba 
de dag bos shig__/de dag gis bos pa dang /_des smras pa/_shes ldan dag de yang rgyal po rgyal rigs spyi bor dbang bskur ba yin la/_nged kyang rgyal po rgyal rigs spyi bor dbang bskur ba 
yin na/_ci'i phyir khyed cag lo thang dang dpya sdud par byed/_deng la phyin chad lo thang dang dpya ma sdud cig__/de dag gis bsams pa/_gzhon nu 'di ni rgyus mi shes pa yin pas bdag cag rgyal po pad+ma 
chen po'i gan du 'dong zhing song nas bsnyad par bya'o snyam nas/_de dag rgyal po pad ma chen po'i gan du song ste phyin nas smras pa/_lha bdag cag ang ga'i rgyal po'i zho shas 'tsho ba lo thang dang dpya sdud 
pa na gzhon nu gzugs can snying pos bkag na/_ci bsdu bar 'tshal lam/_'on te slar mchi bar 'tshal/_des smras pa/_shes ldan dag gzhon nu de ni rgyus mi shes pa yin pas khyed cag sngon ji ltar 
lo thang dang dpya sdud pa de bzhin du sdus shig__/de dag gis yang bsdu bar brtsams te/_de dag 'ongs nas phyir ldog pa gzhon nu gzugs can snying pos mthong nas smras pa/_shes ldan dag ngas 
khyed la phyin chad lo thang dang dpya ma sdud cig ces ma bzlog gam/_ci'i phyir yang khyed lo thang dang dpya sdud/_gal te re zhig 'khod na de lta na legs/_gal te mi 'khod na mtshams chen po gcad par 
bya'o/_/de dag skrag nas bsams pa/_gzhon nu 'di ni gdug pa pha rol gnon pa yin pas bdag cag la gnod pa byed par 'gyur ba gang yin pa de lta bu'i gnas yod par 'gyur gyis/_bdag cag 
ang ga'i rgyal po'i gan du dong ste sbran par bya'o snyam nas de dag ang ga'i rgyal po'i gan du dong ste phyin nas smras pa/_lha bdag cag lha'i zho shas 'tsho ba lags te/_bdag cag lha'i lo thang dang dpya 
sdud pa na rgyal po pad ma chen po'i bu gzhon nu gzugs can snying po des bzlog lags na/_da gal te lhas btang snyoms mdzad na slad kyis gnod pa chen po bgyid par 'gyur ba gang lags pa de lta bu'i 
gnas mchis par 'gyur ro/_/tshigs su bcad pa yang smras pa/_ji srid shing ni gzhon pa'i tshe/_/sen mo dag gis gcad nus pa/_/de nyid chen por skyes pa na/_/sta re brgyas kyang gcad par dka'/_/
ang ga'i rgyal pos rgyal po pad ma chen po la gzhon nu gzugs can snying po mgul pa nas thogs la tshur bkri ba'am/_yang na rtswa dang chas sta gon gyis shig dang /_nga nyid 'o nir 'ong ngo zhes phrin yig 
spring ngo /_/rgyal po pad ma chen pos phrin yig glags nas de mi bde bar gyur te lag pa 'gram pa la gtad nas sems khongs su chud cing 'dug 'dug nas/_des gzhon nu gzugs can snying po bos nas 
smras pa/_ci'i phyir khyod kyis ang ga'i rgyal po'i zho shas 'tsho ba dag lo thang dang dpya sdud pa zlog__/des khros te nga la 'di dang 'di skad ces spring ngo /_/des smras pa/_lha ci skol de la lo thang 'bul ba 
lags sam/_bu lo thang 'bul ba yin no/_/des smras pa/_lha de yang rgyal po rgyal rigs spyi bor dbang bskur ba lags la/_skol kyang rgyal po rgyal rigs spyi bor dbang bskur ba lags 
na/_ci'i slad du skol de la lo thang dang dpya 'bul/_lhas bdag la dpung gi tshogs yan lag bzhi pa stsal ba 'ba' zhig mdzod cig dang /_bdag gis ang ga'i rgyal po dang lhan cig g.yul ngor g.yul 
sprad par bgyi'o/_/de nas rgyal po pad ma chen pos ang ga'i rgyal po la khyod kyi mthu dang /_dpung dang /_brtson 'grus dang /_pha rol gnon pa gang dag yin pa de dag thams cad ma nyams par gyis shig 
ces phrin yig spring ngo /_/ang ga'i rgyal pos thos nas mi bzod pa skyes te blon po rnams la smras pa/_shes ldan dag de'i yul 'khor gzhom par byas/_dpung gi tshogs yan lag bzhi pa go skon cig_/
des dpung gi tshogs yan lag bzhi pa glang po che pa'i tshogs dang /_rta pa'i tshogs dang /_shing rta pa'i tshogs dang /_dpung bu chung gi tshogs go bskon te yul ma ga d+ha gzhom par brtsams pa dang /
ma ga d+ha na gnas pa'i skye bo'i tshogs kyis rgyal po pad ma chen po la lha ang ga'i rgyal po 'di dpung gi tshogs yan lag bzhi pa glang po che pa'i tshogs dang /_rta pa'i tshogs dang /_shing rta pa'i tshogs dang /
dpung bu chung gi tshogs go bskon te yul ma ga d+ha 'joms par bgyid do zhes sbron pa dag btang ngo /_/rgyal po pad ma chen pos thos nas de mi bde bar gyur te lag pa 'gram pa la gtad nas sems khongs 
su chud cing 'dug 'dug nas/_des gzhon nu gzugs can snying po bos te/_de la dpung gi tshogs yan lag bzhi pa byin no/_/gzhon nu gzugs can snying pos blon po'i bu lnga brgya bsdus te smras pa/
shes ldan dag nga ni ang ga'i rgyal po dang lhan cig g.yul ngor g.yul sprod par byed na shes ldan dag ci byed/_de dag gis smras pa/_gzhon nu khyod kyi gnas skabs gang lags pa de bdag cag gi yang lags 
so/_/des tshigs su bcad pa smras pa/_mi gang la ni khyim dpal gnas/_/de ni kun gyis yongs bsrung bya/_/de nyams na ni kun nyams te/_/lte ba chag pas rtsibs rnams bzhin/_/da khyed kyis 
kun nas yongs su bsrung bar bya'o/_/de dag gis smras pa/_lha'i gnas skabs gang lags pa de bdag cag gi yang lags la/_lha'i zhabs gang na ba de na bdag cag gi mgo mchis so/_/de nas 
des dpung gi tshogs yan lag bzhi pa go bskon te/_rgyal po'i khab nas byung ngo /_/rgyal po pad ma chen po steng gi khang bzangs kyi gzhir gtogs pa na blon po'i tshogs kyis bskor cing 'dug pa des de 
byung ba mthong nas des blon po rnams la smras pa/_shes ldan dag dmag 'di su'i yin/_de dag gis smras pa/_lha gzhon nu gzugs can snying po'i lags so/_/des smras pa/_shes ldan dag e 
ma 'di dmag mang po dang ldan no zhes smras pas/_de'i ming dmag ldan gzugs can snying po/_dmag ldan gzugs can snying po zhes bya bar gyur to/_/de na kha cig gis ni bzo sbyangs gzugs can snying po zhes bya 
bar shes so/_/kha cig gis ni dmag ldan gzugs can snying po zhes bya bar shes so/_/gzhon nu gzugs can snying pos blon po'i bu lnga brgya po dag la smras pa/_shes ldan dag ang ga'i rgyal po 'di 
ni gdug pa pha rol gnon pa dpung dang mthu che bar gyur pa yin pas yu bu cag gis 'di dang lhan cig g.yul sprad par ni mi nus kyis/_'di ltar de bag yangs su go phud pa'i phru ma brdzi zhing bzhabs 
te gsad par bya'o/_/de dag gis de bag yangs su go phud pa'i phru ma brdzis nas de dag gis ang ga'i rgyal po bzhabs te bsad do/_/ang ga'i rgyal po'i dpung gi tshogs yan lag bzhi pa phyogs 
bzhir byer ba dang /_gzhon nu gzugs can snying pos phyogs bzhir pho nya rta pa dag bkye ste/_shes ldan dag de yang rgyal po rgyal rigs sbyi bor dbang bskur ba yin la/_nged kyang rgyal po rgyal rigs spyi bor dbang bskur 
ba yin gyis phyir log shig dang /_shes ldan dag ngas shes ldan dag la 'tsho ba'i rgyu sbyin par bya'o zhes spring ba dang de dag phyir log go_/de nas ang ga'i rgyal pos grong khyer tsam pa bsrung ba bzhag 
pa des ang ga'i rgyal po ji ltar bsad pa thos nas des sgo bcad de ra ba dag gi khar sbrengs nas 'dug go_/gzhon nu gzugs can snying po yang mthar gyis grong khyer tsam par phyin nas des shing ring po la 
ang ga'i rgyal po'i mgo btags te bstan nas smras pa/_ngas khyod kyi jo bo gang yin pa de gnas skabs 'di lta bur byas kyis/_gal te je phyir 'byung na de lta na legs/_gal te phyir mi 'byung 
na khyod kyang gnas skabs 'di lta bur byas par 'gyur ba gang yin pa de lta bu'i gnas yod par 'gyur ro/_/des thos nas mi bde bar gyur te/_des bsams pa/_yul dang srog la gnod gyur na/_/
skyes bus kun du srog bsrung bya/_/blo yis gnyis ka dpyad byas na/_/yul ni yang rnyed srog rnams min/_/snyam nas de ral gri mgul du thogs te phyir byung ngo /_/de na gzhon nu gzugs can 
snying pos ang ga'i rgyal po bsad de grong khyer tsam pa rang gi lag tu thob nas des rgyal po pad ma chen po la lha bdag gis ang ga'i rgyal po bkum ste grong khyer tsam pa rang gi sug par 
thob lags na/_lha yongs su ma grub pa gzhan ci mchis bka' stsol cig dang yongs su bsgrub par bgyi'o zhes phrin yig spring ngo /_/de mgu nas des de la gdugs dang /_cod pan dang /_thod bskur te/
bu khyod kyis 'o ni nyid du rgyal srid byed du chug shig__/ngas kyang 'di nyid du rgyal srid byed du gzhug go zhes spring ngo /_/de nas gzhon nu gzugs can snying pos yul ang ga dag tu rgyal srid 'byor pa rgyas 
pa bde ba lo legs pa skye bo dang mi mang pos gang ba byed du bcug go/_dus gzhan zhig na rgyal po pad ma chen po dus la bab nas rgyal po'i khab kyi blon po rnams kyis rgyal po gzugs can snying po 
la lha khyod kyi yab dus la bab bo zhes spring nas/_de ang ga dang ma ga d+ha pa'i blon po rnams kyis rgyal srid la dbang bskur ba chen pos dbang bskur to/_/de nas rgyal po gzugs can snying pos 
yul ang ga dang ma ga d+ha dag tu rgyal srid 'byor pa/_rgyas pa/_bde ba/_lo legs pa/_skye bo dang mi mang pos gang ba/_thab mo dang /_tha ba dang /_phyi dgra dang /_nang 'khrug rab tu zhi ba/_chom rkun 
dang /_mu ge dang /_nad dang bral ba/_sa lu dang /_bu ram shing gi phreng ba dang /_ba lang dang /_ma he phun sum tshogs pa byed du bcug ste/_chos dang ldan pa chos kyi rgyal pos chos kyi rgyal srid byed du bcug go_/
de nas bram ze'i khye'u gsang tshig 'dod pa gsang tshig tshol ba zhig yul dbus nas lho phyogs su song ngo /_/de na bram ze rig byed dang rig byed kyi yan lag gi pha rol du son pa yul tha dad pa na 
gnas pa'i bram ze rnams kyi ston par gyur pa zhig 'dug nas/_bram ze'i khye'u de bram ze de'i drung du song ste phyin nas zhi ba dang spyod lam zhi bas mgo bos phyag 'tshal te phyogs gcig tu 'dug go/
de nas bram ze des bram ze'i khye'u de la 'ongs pa legs so zhes bya ba'i tshig gis kun du spyad nas smras pa/_kye bram ze'i khye'u khyod ga las 'ongs ci zhig 'dod/_bram ze'i khye'us smras pa/
bdag yul dbus nas mchis te/_mkhan po'i zhabs la sri zhu bgyid par 'tshal lo/_/ci zhig gi phyir/_rig byed bklag pa'i slad du'o/_/bu legs kyis de bzhin du gyis shig__/de ni bram zes bya ba yin no/_/
bram ze'i khye'u des bram ze de'i drung du rig byed bklag par bya bar brtsams so/_/bram ze'i khye'u rnams kyi kun du spyod pa ni 'di yin te/_gang gi tshe mi klog par gyur pa de'i tshe na lan 'ga' ni chu ngogs su nye 
reg byed du 'dong ngo /_/lan 'ga' ni grong khyer ltar 'dong ngo /_/lan 'ga' ni yam sreg shing thur 'dong ngo/_/ji tsam dus gzhan zhig na de dag mi klog par gyur nas de'i tshe de dag yam sreg shing thur dong ba 
dang /_de dag la lam gyi bar du bar skabs kyi gtam brjod pa 'di lta bu 'di byung ste/_kye kud sa'i bu dag__/bad sa'i bu dag__/shan di li'i bu dag__/ba ra dwa dza'i bu dag_/lnga pa'i bu dag__/nye lnga'i bu dag__/
je khyed cag las gang ni yul ga las 'ongs pa dri bar bya'o/_/de na bram ze'i khye'u gcig gis smras pa/_kho bo ni yul shar nas so/_/gzhan zhig gis smras pa/_kho bo ni lho phyogs nas so/_/
yang gzhan zhig gis smras pa/_kho bo ni nub phyogs nas so/_/yang gzhan zhig gis smras pa/_kho bo ni byang phyogs nas so/_/bram ze'i khye'u des smras pa/_kho bo ni yul dbus nas so/_/de dag 
gis smras pa/_shes ldan dag bdag cag gis yul thams cad mthong zhing thos na yul dbus ni ma mthong ma thos so/_/shar na blo can gnas pa ste/_/lho phyogs na ni g.yon byed 'dug_/
nub kyi yul na phra ma can/_/byang phyogs na ni tshig rtsub po/_/zhes tshigs su bcad pa yang smras so/_/de nas dris pa/_bram ze'i khye'u yul dbus ci 'dra/_shes ldan dag yul dbus ni yul rnams kyi 
mchog yin te/_sa lu dang /_bu ram shing gi phreng ba dang /_ba lang dang /_ma he phun sum tshogs pa/_slongs mo pa brgyas khyab pa/_dbus pa'i skye bos gang ba/_mtha' 'khob pa'i skye bos spangs pa 
skye bo mkhas pas bsten pa/_de na chu klung gang gA kha rje dang /_bsod nams dang /_bkra shis dang /_gtsang ba dang /_gtsang ba nyid kyi gnas su grags pa/_'gram gnyis nas rlan 'phyo ba/_drang srong rnam 
kyi bsti gnas zhes bya ba chu dgur bcwa brgyad 'bab pa yod de/_der drang srong rnams kyis dka' thub spyad na rang gi lus nyid kyis mtho ris su 'dong ba yin no/_/kye bram ze'i khye'u de ni mjal gyis 
gzhan 'di 'dri'o/_/yul dbus na mkhas par bgrang ba dag yod dam/_shes ldan dag kho bos dang po nyid nas shes ldan dag yul dbus ni dbus pa'i skye bos gang ba/_mtha' 'khob 
pa'i skye bos spangs pa/_skye bo mkhas pas bsten pa'o zhes ma smras sam/_bram ze'i khye'u khyod kyis de skad smras so/_/bram ze'i khye'u yul dbus na 'di lta ste dper na bdag cag gi 
mkhan po dang 'dra ba smra ba'i khyu mchog de lta bu dag yod dam/_shes ldan dag yul dbus na bdag cag gi mkhan pos gang dag gi gdong du lta bar yang mi nus pa/_snyan par smra ba/_smra ba'i 
khyu mchog de lta bu dag yod do/_/bram ze'i khye'u des de dag la de lta de ltar yul dbus kyi bsngags pa brjod pa dang /_'di ltar de dag thams cad yul dbus su 'dong 'dod par gyur to/_/
de nas bram ze'i khye'u de dag yam sreg shing dag btsal te/_yam sreg shing gi khur thogs nas bram ze'i khyim ga la ba der dong ste phyin nas yam sreg shing gi khur dag mtha' gcig tu bzhag ste 
bram ze de ga la ba der dong nas phyin pa dang /_bram ze de la 'di skad ces smras so/_/mkhan po mkhyen par mdzod cig__/bram ze'i khye'u 'dis ci nas kyang bdag cag thams cad yul dbus su mchi 'tshal 
bar gyur pa de ltar yul dbus kyi bsngags pa brjod do/_/bram ze des smras pa/_bu dag ji snyed thos pa de snyed bgrod par bya ba yin nam/_'di ltar yul dag ni thos na dga' bar 'gyur ba yin pas mnyan par bya'i 
bgrod par ni mi bya'o/_/mkhan po bram ze'i khye'u 'di'i mchid nas yul dbus na bdag cag gi mkhan pos gang dag gi gdong du lta bar yang mi nus pa/_snyan par smra ba/_smra ba'i khyu mchog de lta bu dag 
mchis so zhes mchi'o/_/bu dag ci kho bo na re sa'i steng na kho bo gcig pu kho na smra ba yin gyi/_smra ba gzhan 'ga' yang med do zhes zer ram/_sa ni rin po che mang po 'dzin pa yin pas sa gzhi ni mdzes pa mdzes pa 
dag gis gang ba yin no/_/mkhan po re zhig yul de yang mthong bar 'gyur zhing chu ngogs su nye reg kyang bgyi/_smra ba'i khyu mchog de dag la yang bsnyen bkur bgyi/_rgol ba dag kyang tshar gcad par bgyi/_rang gi grags 
pa yang bsgrag par bgyi/_rnyed pa yang bsgrub par bgyi/_bdag cag yul dbus su mchi'o/_/bram ze de slob ma la rjes su chags pa dang bcas pa dang /_'khor nyung ba yin pas des bram ze'i khye'u de dag la 'di skad 
ces smras so/_/bu dag gal te de lta na g.yang gzhi dag dang /_shing shun dag dang /_dbyu gu dag dang /_blugs gzar dag dang /_dgang gzar dag dang /_ril ba dag long zhig dang yul dbus su 'dong ngo /_/de dag gis 
de dag blangs nas bram ze de bram ze'i khye'u de dag dang lhan cig yul dbus su 'phags pa dang /_des rgol ba kha cig ni tshar bcad de rgol ba'i shing rta la sbyor bar byed/_kha cig ni mgor thal ba'i bum pa dag gis bsnun/
kha cig ni 'phong gi dpong sar khwa bzhin du thag ring po nas yongs su spong bar byed/_kha cig ni gdugs dang /_rgyal mtshan dang /_ba dan dag gis bsu bar byed/_kha cig ni slob ma nyid du khas len par byed cing de mthar gyi grong dang /
grong khyer dang /_grong rdal dang /_dbye tshongs dang /_tshong rdal dag tu rgol ba 'dul zhing rgyal po'i khab tu phyin to/_/bram ze des bsams pa/_bdag gis ci'i phyir rtsa ba spangs te yal ga dang /_'dab ma dang /_lo ma la 
nyug par bya/_rgol ba gang dag dang /_mkhas par bgrang ba gang ji snyed pa de dag thams cad kyang rgyal po dang nye ba yin gyis/_bdag kyang rgyal po'i gan du 'gro'o snyam nas bram ze de rgyal po gzugs can snying 
po ga la ba der song ste phyin nas rgyal po gzugs can snying po la rgyal ba dang tshe spel ba byas te phyogs gcig tu 'dug go/_/phyogs gcig tu 'dug nas rgyal po gzugs can snying po la 'di skad ces smras 
so/_/lha bdag la bla ma las yi ge nyung shas shig blangs pa mchis te/_de'i slad du lha'i spyan sngar rgol ba dag dang lhan cig bka' mchid rnam par gtan la dbab par 'tshal lo/_/rgyal pos blon po rnams 
la smras pa/_shes ldan dag nga'i yul na bram ze 'di dang lhan cig gtam rnam par gtan la 'bebs par byed pa'i rgol ba 'ga' yod dam/_blon po rnams kyis smras pa/_lha grong na la da na bram ze gnas len gyi bu 
zhes bgyi ba rig byed dang rig byed kyi yan lag gi pha rol tu mchis pa zhugs lta bu'i shes pas rang gi smra ba gsal bar bgyid/_gzhan gyi smra ba tshar gcod par rngo thog pa zhig mchis te/_des bstan bcos 
gnas len gyi bu zhes bgyi ba nye bar sbyar to/_/mkhan po gnas len gyi bu de bos shig__/lha bod par bgyi'o zhes de dag gis de bos nas de rgyal po gzugs can snying po ga la ba der song ste phyin nas rgyal po 
gzugs can snying po la rgyal ba dang tshe spel ba byas te phyogs gcig tu 'dug pa dang /_blon po rnams kyis smras pa/_lha mkhan po de 'di lags so/_/rgyal pos 'ongs pa legs so zhes bya ba'i tshig gis kun du spyad 
de smras pa/_mkhan po khyod kho bo'i mdun du bram ze 'di dang lhan cig gtam rnam par gtan la dbab par byed nus sam/_gnas len gyi bus smras pa/_bdag gis rngo thog pas rgyal po dgyes par bgyi'o/_/
rgyal pos blon po rnams la bsgo ba/_shes ldan dag rgol ba'i dkyil 'khor shoms shig__/phyogs dang gzhan gyi phyogs dag rnam par zhog shig__/blon po rnams kyis rgol ba'i dkyil 'khor bshams 
shing phyogs dang gzhan gyi phyogs dag rnam par bzhag go_/de nas blon po rnam kyis rgyal po'i rkang pa gnyis la phyag 'tshal te smras pa/_lha phyogs snga ma gang bgyid du stsal/_rgyal pos smras pa/
_bram ze 'di 'gron pa yin gyis 'di phyogs snga ma byed du chug shig_/bram ze de phyogs snga ma byed du bcug nas des rgyud chags lnga brgya bzlas so/_/gnas len gyi bus phyir bzlas te/_khyod kyi 'di ni rigs 
pa med pa yin no/_/'di ni mi mthun pa yin no/_/'di ni mi 'thad pa yin no zhes skyon btags pa dang bram ze de cang mi smra bar 'dug go_/tshar gcad pa'i gnas rnams kyi nang na 'di lta ste lan la sbobs pa med 
pa 'di ni tha chad yin no/_/rgyal pos blon po rnams la smras pa/_shes ldan dag su rgyal/_lha mkhan po gnas len gyi bu'o/_/de nas rgyal po yid dga' zhing yid dga' nas ro stod bsrang ste 
lag pa g.yas pa brkyang nas bdag gi yul na smra ba'i khyu mchog 'di lta bu dag yod pa ni bdag gis rnyed pa legs par rnyed do zhes ched du brjod pa ched du brjod nas smras pa/_mkhan po khyod gnas gang na gnas/
gnas len gyi bus smras pa/_lha grong na la da na'o/_/khyod song la grong de khyod kyis rgol ba'i longs spyod gyis shig__/gnas len gyi bu rangs pa dang dga' ba dang mchog tu dga' bar gyur nas skye bo mkhas pa 
rnams kyis yongs su bskor te/_grong der song ngo /_/'jig rten ni 'byor ba 'dod cing rgud pa la ma dad pa yin pas de la bram ze du ma zhig gis bu mo chung mar len du bcug pa dang /_de nas gnas len gyi bu des rigs 
mnyam pa las chung ma blangs te/_de de dang lhan cig rtse bar byed/_dga' bar byed/_dga' mgur spyod par byed do/_/rtse bar byed/_dga' bar byed/_dga' mgur spyod par byed pa de'i chung ma la bu ro stod ring ba ring 
ba zhig btsas nas de'i nye du dag 'dus shing lhags nas nyi ma bdun gsum nyi shu rtsa gcig tu btsas pa'i btsas ston rgya cher byas te/_khye'u'i ming cir gdags zhes ming 'dogs par byed do/_/nye du rnams 
kyis smras pa/_khye'u 'di ro stod ring ba ring bar gyur pas khye'u 'di'i ming stod rings su gdags so zhes de'i ming stod rings su btags so/_/bram ze'i khye'u stod rings ma ma brgyad po pang na 'tsho ba'i ma ma 
gnyis dang /_nu ma snun pa'i ma ma gnyis dang /_dri ma 'phyi ba'i ma ma gnyis dang /_rtsen grogs kyi ma ma gnyis la rjes su gtad do/_/de ma ma brgyad po dag gis 'o ma dang /_zho dang /_mar dang /_zhun mar dang /
mar gyi snying khu dang /_gzhan yang yo byad kyi bye brag gtso bo gtso bo dag gis sring bar byed/_skyed par byed cing rdzing na gnas pa'i pad ma bzhin myur du skyed par byed do/_/de gang gi tshe chen por gyur pa de'i tshe 
yi ge dang /_grangs dang /_rtsis dang /_lag rtsis dang /_dbyung ba dang /_gzhug pa dang /_gzhag pa dang /_'byed pa dang /_klog pa'i pha rol tu son cing /_de'i tshe na bram ze'i spyod tshul dang /_spyod pa dang /_gtsang sbra 
dang /_kun tu spyod pa dang /_thal ba blang ba dang /_bya ma bum blang ba dang /_sa blang ba dang /_lag stangs dang /_thor tshugs dang /_rab bsngags bya ba dang /_kye zhes bya ba dang /_nges brjod kyi rig byed dang /_mchod sbyin gyi 
rig byed dang /_snyan tshig gi rig byed dang /_srid bsrung gi rig byed dang /_bram ze'i las drug po mchod sbyin byed pa dang /_mchod sbyin byed du 'jug pa dang /_klog pa dang /_klog tu 'jug pa dang /_sbyin pa dang /_len pa la 
mkhas pa'i bram ze rig byed dang /_rig byed kyi yan lag gi pha rol tu son pa me lta bu'i shes pas rang gi smra ba gsal bar byed pa/_gzhan gyi smra ba tshar gcod par byed nus par gyur to/_/yang de rtse bar byed/
dga' bar byed/_dga' mgur spyod par byed pa'i chung ma la bu mo mig gnyis bya sha ri ka 'dra ba zhig btsas nas de'i nye du dag 'dus shing lhags nas nyi ma bdun gsum nyi shu gcig tu btsas pa'i btsas 
ston rgya cher byas te/_bu mo'i ming cir gdags shes ming 'dogs par byed do/_/nye du rnams kyis smras pa/_bu mo 'di'i mig gnyis bya sha ri ka 'dra bas bu mo 'di'i ming sha ri kar gdags so zhes de'i 
ming sha ri kar btags so/_/bu mo sha ri ka bsrings shing bskyed de chen mor gyur to/_/des yig 'bru'i yi ge la nye bar sbyar nas des yig 'bru'i yi ge dag lobs so/_/dus gzhan zhig na bram ze'i 
khye'u stod rings sha ri ka dang lhan cig 'gyed par byed pa na sha ri kas de tshar bcad nas/_phas stod rings la smras pa/_bu khyod skyes pa yin na bud med kyis tshar bcad dam/_nga 'das nas rgol ba'i 
longs spyod dag phrogs par 'gyur ro/_/de nas yang bram ze'i khye'u gsang tshig 'dod pa gsang tshig tshol ba zhig yul dbus nas lho phyogs su song ngo /_/de na bram ze skar rgyal zhes bya ba 'jig rten rgyang pan 
la mkhas pa/_rig byed dang rig byed kyi yan lag gi pha rol tu son pa yul tha dad pa na gnas pa'i bram ze rnams kyi ston par gyur pa zhig 'dug nas/_bram ze'i khye'u de bram ze de'i drung du song ste phyin nas/
zhi ba dang spyod lam zhi bas mgo bos phyag 'tshal te phyogs gcig tu 'dug go/_/de nas bram ze skar rgyal gyis bram ze'i khye'u de la 'ongs pa legs so zhes bya ba'i tshig gis kun tu spyad nas smras 
pa/_kye bram ze'i khye'u khyod ga las 'ongs pa ci zhig 'dod/_bram ze'i khye'us smras pa/_bdag yul dbus nas mchis te/_mkhan po'i zhabs la sri zhu bgyid par 'tshal lo/_/ci zhig gi phyir/_'jig 
rten rgyang pan gzung ba'i slad du'o/_/bram ze'i khye'u legs kyis de bzhin gyis shig__/de ni bram zes bya ba yin no/_/bram ze'i khye'u des bram ze skar rgyal gyi drung du 'jig rten rgyang pan gzung bar brtsams so/_/
bram ze'i khye'u rnams kyi kun du spyod pa ni 'di yin te/_gang gi tshe mi klog par gyur pa de'i tshe na lan 'ga' ni chu'i ngogs su nye reg byed du 'dong ngo /_/lan 'ga' ni grong khyer ltar 'dong ngo /_lan 'ga' 
ni yam sreg shing thur 'dong ngo /_/ji tsam dus gzhan zhig na de dag mi klog par gyur nas de'i tshe de dag yam sreg shing thur dong ba dang /_de dag la lam gyi bar du bar skabs kyi gtam brjod pa 'di lta bu 'di 
dag byung ste/_kye kud sa'i bu dag__/bad sa'i bu dag__/shan di la'i bu dag__/ba ra dwa dza'i bu dag__/lnga pa'i bu dag__/nye lnga pa'i bu dag je khyed cag las gang ni yul ga las 'ongs pa dri bar bya'o/_/
de na bram ze'i khye'u gcig gis smras pa/_kho bo ni yul shar nas so/_/gzhan zhig gis smras pa/_kho bo ni lho phyogs nas so/_/yang gzhan zhig gis smras pa/_kho bo ni nub phyogs nas so/_/
yang gzhan zhig gis smras pa/_kho bo ni byang phyogs nas so/_/bram ze'i khye'u des smras pa/_kho bo ni yul dbus nas so/_/de dag gis smras pa/_shes ldan dag bdag cag gis yul thams cad mthong zhing 
thos na yul dbus ni ma mthong ma thos so/_/shar na blo can gnas pa ste/_/lho phyogs na ni g.yon byed 'dug__/nub kyi yul na phra ma can/_/byang phyogs na ni tshig rtsub po/_/zhes tshigs su bcad pa yang smras so/_/
de nas dris pa/_bram ze'i khye'u yul dbus ci 'dra/_shes ldan dag yul dbus ni yul rnams kyi mchog yin te/_sa lu dang /_bu ram shing gi phreng ba dang /_ba lang dang /_ma he phun sum tshogs pa/_slongs mo 
pa brgyas khyab pa/_dbus pa'i skye bos gang ba/_mtha' 'khob pa'i skye bos spangs pa/_skye bo mkhas pas bsten pa/_de na chu klung gang gA kha rje dang /_bsod nams dang /_bkra shis dang /_gtsang ba dang /
gtsang ba nyid kyi gnas su grags pa/_'gram gnyis nas rlan 'phyo ba/_drang srong rnams kyi bsti gnas shes bya ba chu dgur bcwa brgyad 'bab pa yod de/_der drang srong rnams kyi dka' thub spyad na rang gi lus nyid 
kyis mtho ris su 'dong ba yin no/_/kye bram ze'i khye'u de ni mjal gyis gzhan 'di 'dri'o/_/yul dbus na mkhas par bgrang ba dag yod dam/_shes ldan dag kho bos dang po nyid nas shes ldan dag_/
yul dbus ni dbus pa'i skye bos gang ba/_mtha' 'khob pa'i skye bos spangs pa/_skye bo mkhas pas bsten pa'o zhes ma smras sam/_bram ze'i khye'u khyod kyis de skad smras so/_/bram ze'i 
khye'u yul dbus na 'di lta ste dper na/_bdag cag gi mkhan po dang 'dra ba smra ba'i khyu mchog de lta bu dag yod dam/_shes ldan dag yul dbus na bdag cag gi mkhan pos gang dag gi gdong du lta bar yang 
mi nus pa snyan par smra ba/_smra ba'i khyu mchog de lta bu dag yod do/_/bram ze'i khye'u des de dag la de lta de ltar yul dbus kyi bsngags pa brjod pa dang /_'di ltar de dag thams cad yul dbus su 
'dong 'dod par gyur to/_/de nas bram ze'i khye'u de dag gis yam sreg shing dag btsal te/_yam sreg shing gi khur thogs nas bram ze de'i khyim ga la ba der dong ste phyin nas yam sreg shing gi 
khur mtha' gcig tu bzhag ste/_bram ze de ga la ba der dong nas phyin pa dang /_bram ze de la 'di skad ces smras so/_/mkhan po mkhyen par mdzod cig__/bram ze'i khye'u 'dis ci nas kyang bdag 
cag thams cad yul dbus su mchi 'tshal bar gyur pa de ltar yul dbus kyi bsngags pa brjod do/_/bram ze skar rgyal gyis smras pa/_bu dag ji snyed thos pa de snyed bgrod par bya ba yin nam/_'di ltar 
yul dag ni thos na dga' bar 'gyur ba yin pas mnyan par bya'i bgrod par ni mi bya'o/_/mkhan po bram ze'i khye'u 'di'i mchid nas yul dbus na bdag cag gi mkhan pos gang dag gi gdong du lta 
bar yang mi nus pa/_snyan par smra ba/_smra ba'i khyu mchog de lta bu dag mchis so zhes mchi'o/_/bu dag ci kho bo na re sa'i steng na kho bo gcig pu smra ba kho na yin gyi smra ba gzhan 'ga' yang med do zhes zer 
ram/_sa ni rin po che mang po 'dzin pa yin pas sa gzhi ni mdzes pa mdzes pa dag gis gang ba yin no/_/mkhan po re zhig yul de yang mthong bar 'gyur zhing chu ngogs su nye rig kyang bgyi/_smra ba'i 
khyu mchog de dag la yang bsnyen bkur bgyi/_rgol ba dag kyang tshar gcad par bgyi/_rang gi grags pa yang bsgrag par bgyi/_rnyed pa yang bsgrub par bgyis/_bdag cag yul dbus su mchi'o/_/
bram ze de slob ma la rjes su chags pa dang bcas pa dang /_'khor nyung ba yin pas des bram ze'i khye'u de dag la 'di skad ces smras so/_/bu dag gal te de lta na g.yang gzhi dag dang /_shing shun dag dang /_dbyu gu 
dag dang /_blugs gzar dag dang /_dgang gzar dag dang /_ril ba dag long shig dang yul dbus su 'dong ngo /_/de dag gis de dag blangs nas bram ze de bram ze'i khye'u de dag dang lhan cig yul dbus su 'phags pa 
dang /_des rgol ba kha cig ni tshar bcad de rgol ba'i shing rta la sbyor bar byed/_kha cig ni mgor thal ba'i bum pa dag gis bsnun/_kha cig ni 'phong gi dpong sar khwa bzhin du thag ring po nas yongs su spong bar byed/
_kha cig ni gdugs dang /_rgyal mtshan dang /_ba dan dag gis bsu bar byed/_kha cig ni slob ma nyid du khas len par byed cing de mthar gyis grong dang /_grong khyer dang /_grong rdal dang /_dbye tshongs dang /_tshong rdal dag tu 
rgol ba 'dul zhing rgyal po'i khab tu phyin to/_/bram ze skar rgyal gyis bsams pa/_bdag gis ci'i phyir rtsa ba spangs te yal ga dang /_'dab ma dang /_lo ma la nyug par bya/_rgol ba gang dag dang /_mkhas 
par bgrang ba gang ji snyed pa de dag thams cad kyang rgyal po dang nye ba yin gyis/_bdag kyang rgyal po'i gan du 'gro'o snyam nas bram ze skar rgyal rgyal po gzugs can snying po ga la ba der song ste phyin nas/
rgyal po gzugs can snying po la rgyal ba dang tshe spel ba byas te phyogs gcig tu 'dug go/_/phyogs gcig tu 'dug nas rgyal po gzugs can snying po la 'di skad ces smras so/_/lha bdag la bla ma 
las yi ge nyung shas shig blangs pa mchis te/_de'i slad du lha'i spyan sngar rgol ba dag dang lhan cig bka' mchid rnam par gtan la dbab par 'tshal lo/_/rgyal pos blon po rnams la smras pa/_shes ldan 
dag mkhan po gnas len gyi bu de gang na 'dug__/lha grong na la da na'o/_/mkhan po gnas len gyi bu de bos shig__/lha bod par bgyi'o zhes de dag gis de bos nas de rgyal po gzugs can snying po ga la ba der 
song ste phyin nas/_rgyal po gzugs can snying po la rgyal ba dang tshe spel ba byas te phyogs gcig tu 'dug pa dang blon po rnams kyis smras pa/_lha mkhan po de 'di lags so/_/rgyal pos 'ongs pa legs so/_/
zhes bya ba'i tshig gis kun du spyad de smras pa/_mkhan po khyod kho bo'i mdun du bram ze skar rgyal dang lhan cig gtam rnam par gtan la dbab pa byed nus sam/_gnas len gyi bus smras pa/_bdag gis rngo 
thog gis rgyal po dgyes par bgyi'o/_/rgyal pos blon po rnams la bsgo ba/_shes ldan dag rgol ba'i dkyil 'khor shoms shig__/phyogs dang gzhan gyi phyogs dag rnam par zhog shig__/blon po rnams 
kyis rgol ba'i dkyil 'khor bshams shing phyogs dang gzhan gyi phyogs dag rnam par bzhag go/_/de nas blon po rnams kyis rgyal po'i rkang pa gnyis la phyag 'tshal te smras pa/_lha phyogs snga ma gang bgyid 
du stsal/_rgyal pos smras pa/_bram ze skar rgyal 'di 'gron pa yin gyis/_'di phyogs snga ma byed du chug shig__/bram ze skar rgyal gyis smras pa/_lha bram ze gnas len gyi bu 'di rgan pa lags pas 'di 
phyogs snga ma bgyid du stsal bar gsol/_bram ze gnas len gyi bus bsams pa/_bram ze skar rgyal 'di gzhung gsar la byed pa gsal bas bdag gis 'di dang lhan cig smra bar mi nus kyis/
je 'di dang lhan cig tshig 'gred pa zhig bya'o snyam nas des rgyud chags lnga brgya bzlas so/_/bram ze skar rgyal gyis phyir bzlas te/_khyod kyi 'di ni rigs pa med pa yin no/_/'di ni mi mthun pa yin no/_/
'di ni mi 'thad pa yin no zhes skyon btags pa dang /_bram ze gnas len gyi bu cang mi smra bar 'dug go_/tshar bcad pa'i gnas rnams kyi nang na 'di lta ste lan la spobs pa med pa 'di ni tha chad yin no/_/rgyal pos 
blon po rnams la smras pa/_shes ldan dag su rgyal/_bram ze skar rgyal rgyal lo/_/shes ldan dag bram ze skar rgyal la rgol ba'i longs spyod byin cig_/de dag gis smras pa/_lha gal te skol gyis rgol ba 
mchis shing lhags dgu la rgol ba'i longs spyod stsal bar gyur na ring po mi thogs par skol gyi yul ang ga dang ma ga d+ha dag rgol ba'i longs spyod du 'gyur bas/_'di ltar grong na la da 'di nyid rgol 
ba'i longs spyod kyi ba dan du bgyis la bram ze gnas len gyi bu las phrogs te/_bram ze 'di la stsal cing 'di bas kyang ches rgyal ba gzhan 'ga' zhig mchis na yang skol gyis de la stsal bar bgyi'o/_/
rgyal pos smras pa/_shes ldan dag de bzhin gyis shig__/de dag gis de gnas len gyi bu las phrogs te bram ze skar rgyal la byin no/_/gnas len gyi bus bsams pa/_bdag gis rgyal po 'di la phan 
mang du btags na rgyal po 'dis bdag rjes su ma bsrungs kyis/_bdag gzhan du 'gro'o snyam nas des chung ma la smras pa/_bzang mo kho bos rgyal po 'di la phan mang du btags na rgyal po 'dis kho bo 
rjes su ma bsrungs kyis kho bo gzhan du 'gros khyim gyi so nam dag sdus shig__/des khyim gyi so nam dag bsdu bar brtsams pa dang /_de'i nye du dag gis mkhan po gnas len gyi bu gzhan du 'gro'o/_/
zhes thos nas de dag de'i gan du song ste phyin nas smras pa/_mkhan po ci'i slad du khyim gyi so nam dag sdud/_des smras pa/_shes ldan dag kho bos rgyal po 'di la phan mang du btags na rgyal po 'dis kho bo rjes 
su ma bsrungs kyis kho bo gzhan du 'gro'o/_/de dag gis smras pa/_mkhan po khyod gzhan du ma bzhud par re zhig nye du'i nang 'di nyid du bde bar bzhugs shig__/des tshigs su bcad pa smras pa/_mi ni gzhan gyi 
yul na gnas bla yi/_/rang gi yul na zil gnon gnas pa min/_/de nyid rang yul de na gnyen yang yod/_/bram ze skar rgyal gyis mkhan po gnas len gyi bu gzhan du 'gro'o zhes thos nas de de'i gan du song ste 
phyin nas smras pa/_bdag ni blo bur du 'ongs pa yin pas ring po mi thogs pa kho nar 'gro ste/_'di khyod nyid kyi rgol ba'i longs spyod du 'gyur gyis gzhan du ma 'gro bar 'dug shig__/des smras pa/
bram ze'i khye'u 'gro'o/_/mkhan po gal te de lta na grong 'di phyed khyod snoms shig__/phyed bdag 'tshal lo/_/bram ze gnas len gyi bus bsams pa/_bdag gis rgyal po 'di la phan mang du btags 
na rgyal po 'dis bdag rjes su ma bsrungs te/_'di ltar bram ze skar rgyal 'dis bdag la 'di lta ste/_longs spyod dag gis longs spyod kyi bgo bsha' byas pa ni phan mang du btags pa yin gyis/
'di la sha ri ka de chung ma'i don du sbyin no snyam nas des chung ma la smras pa/_bzang mo kho bos rgyal po 'di la phan mang du btags na rgyal po 'dis kho bo rjes su ma bsrungs te/_'di ltar bram ze skar rgyal 
'dis kho bo la 'di lta ste/_longs spyod dag gis longs sbyod kyi bgo bsha' byas pa ni phan mang du btags pa yin gyis/_'di la sha ri ka de chung ma'i don du sbyin no/_/des smras pa/_bram ze'i 
khye'u stod rings la dri'o/_/de gnyis kyis de bos te smras pa/_bu bdag cag gis rgyal po 'di la phan mang du btags na rgyal po 'dis bdag cag rjes su ma bsrungs te/_'di ltar bram ze skar rgyal 
'dis bdag cag la 'di lta ste/_longs spyod dag gis longs spyod kyi bgo bsha' byas pa ni phan mang du btags pa yin gyis/_'di la sha ri ka de chung ma'i don du sbyin par bya'o/_/des smras pa/_yab yum 
de ltar dgra bo la mdza' bshes su bgyis na 'di lta ste/_des longs spyod rnams las nyams par bgyid pa'am/_thams cad kyi thams cad du srog dang 'bral bar bgyid par yang 'gyur la/_des bdag cag 
longs spyod dag las nyams par bgyis na/_ci'i slad du skol gyis 'di la sha ri ka mchis brang gi don du stsal bar bgyi/_de gnyis kyis smras pa/_blun po khyod ci shes zhes de gnyis kyis de'i tshig 
tshig ma yin par byas te sha ri ka bram ze skar rgyal la chung ma'i don du byin no/_/des de dpal gyi 'byor pa chen pos bag mar blangs so/_/bram ze'i khye'u stod rings kyis bsams pa/_'di dag gis bdag 
brnyas par gyur pa gang yin pa de thams cad ni thos pa nyung ba las gyur pa yin no snyam nas/_'di ltar bram ze skar rgyal ci zhig shes snyam na/_'jig rten rgyang pan shes so snyam nas des smras pa/
shes ldan dag 'jig rten rgyang pan shes pa ga la yod/_lho phyogs na'o/_/de 'jig rten rgyang pan gyi don du lho phyogs su 'phags nas de mthar gyis lho phyogs su phyin pa dang /_de der song ste dris 
pa/_shes ldan dag 'jig rten rgyang pan shes pa su dag yin/_kun du rgyu dag go/_de de dag gi gan du song ste phyin nas smras pa/_bdag shes ldan dag gi zhabs la sri zhu bgyid par 'tshal lo/_/
ci zhig gi phyir/_'jig rten rgyang pan gzung ba'i slad du'o/_/de dag gis smras pa/__kho bo cag ni khyim pa la 'jig rten rgyang pan mi ston to/_/des smras pa/_gal te de lta na rab tu 'byung ngo /_/de dag gis de 
rab tu phyung nas des bdag gis ji srid du 'jig rten rgyang pan ma bzung ba de srid du bdag gis sen mo mi gcad do zhes des sen mo ring po ring por bzhag nas de'i sen mo ring ba ring bar gyur pas de'i ming kun du 
rgyu sen rings kun du rgyu sen rings shes bya bar gyur to/_/sha ri ka yang bram ze skar rgyal dang lhan cig 'gyed par byed pa na skar rgyal gyis de tshar bcad do/_/bram ze skar rgyal sha ri ka dang lhan cig rtse bar byed/
dga' bar byed/_dga' mgur spyod par byed pa na sems can srid pa tha ma pa spyod pa tshol ba/_thar pa'i snying po bzung ba/_mya ngan las 'das pa la phyogs pa/_'khor ba las phyir phyogs pa/_srid pa'i 
'gro ba thams cad du 'chi 'pho dang skye ba don du mi gnyer ba/_lus tha ma 'dzin pa zhig kyang lha'i ris bzang po zhig nas shi 'phos te sha ri ka'i mngal du zhugs so/_/sha ri kas rmi lam du mi lag na 
sgron ma thogs pa zhig gis bdag gi dku dral te zhugs shing bdag ri chen po'i spo la 'dzeg go/_bdag steng gi nam mkha' la 'gro'o/_/bdag la skye bo phal po che'i tshogs phyag 'tshal lo 
zhes zer ba rmis so/_/rmis nas des bram ze skar rgyal la smras pa/_bdag gis rmi lam 'di dang 'di lta bu zhig rmis so/_/'di ltar bram ze skar rgyal nyid rmi ltas kyi dpyad la mkhas pa yin mod kyi 
des bram ze rmi ltas kyi dpyad 'don pa gzhan dag la smras pa/_bdag gi bram ze mos rmi lam 'di dang 'di lta bu zhig rmis na ci la lta/_de dag gis smras pa/_mkhan po g.yar lam de bzang ste/
mi lag na sgron ma thogs pa zhig gis bdag gi dku dral te zhugs shes mchi ba ni bu btsa' bar 'gyur zhing des lo brgyad gnyis kyis dbang po'i brda sprod pa bklags nas rgol ba thams cad tshar 
gcod par 'gyur ba la lta'o/_/bdag ri chen po'i spo la 'dzeg go/_/bdag steng gi nam mkha' la 'gro'o/_/bdag la skye bo phal po che'i tshogs phyag 'tshal lo zhes mchi ba gang lags pa ni rab 
tu byung nas brtul zhugs grub pa'i bdag nyid chen por 'gyur ba la lta'o/_/dus gzhan zhig na bram ze skar rgyal sha ri ka dang lhan cig 'gyed par byed pa na sha ri kas de tshar bcad nas/_des 
bsams pa/_sngon bdag gis 'di tshar bcad na da 'dis bdag tshar bcad pa'i sbyor ba gang yin snyam nas des bsams pa/_de ni 'di'i mthu ma yin gyi/_'di ltar 'di'i mngal du sems can 
zhugs pa gang yin pa de'i mthu yin no snyam mo/_/de nas zla ba brgyad dam dgu 'das te khye'u gzugs bzang ba/_blta na sdug pa/_mdzes pa/_gsal ba/_gser gyi mdog 'dra ba/_mgo 
gdugs lta bu dang ldan pa/_lag pa ring ba/_'phral ba'i dbyes che ba/_smin ma 'jar ba/_sna'i bzangs mtho ba zhig btsas so/_/btsas nas des bram ze skar rgyal la smras pa/_bram ze'i khye'u 'di 
mes po'i gan du phul na de 'di'i ming 'dogs par 'gyur ro/_/des mes po'i gan du khrid pa dang des khye'u'i ming cir gdags shes bsams na/_bram ze'i khye'u 'di bram ze skar rgyal gyi bu yin 
pas bram ze'i khye'u 'di'i ming nye rgyal du gdags so snyam nas de'i ming nye rgyal zhes bya bar btags so/_/bram ze skar rgyal gyis smras pa/_mes pos bram ze'i khye'u 'di'i ming cir btags 
nye rgyal zhes bya bar btags so/_/des bsams pa/_mes pos bram ze'i khye'u 'di'i ming pha las dras te btags kyis/_bdag gis 'di'i ming ma las dras te gdags so snyam nas bram ze'i khye'u 
'di ma sha ri ka'i bu yin pas 'di'i ming shA ri'i bur gdags so snyam nas de'i ming shA ri'i bu zhes bya bar btags so/_/de na kha cig gis ni bram ze'i khye'u shA ri'i bu zhes bya bar shes so/_/kha cig gis ni 
bram ze'i khye'u nye rgyal zhes bya bar shes so/_/bram ze'i khye'u nye rgyal ma ma brgyad po pang na 'tsho ba'i ma ma gnyis dang /_nu ma snun pa'i ma ma gnyis dang /_dri ma 'phyi ba'i ma ma gnyis dang /_rtsen grogs kyi ma ma 
gnyis la rjes su gtad do/_/de ma ma brgyad po dag gis 'o ma dang /_zho dang mar dang /_zhun mar dang /_mar gyi snying khu dang /_gzhan yang yo byad kyi bye brag gtso bo gtso bo dag gis sring bar byed/_skyed par byed cing rdzing na 
gnas pa'i pad ma bzhin myur du skyed par byed do/_/de gang gi tshe chen po gyur pa de'i tshe yi ge dang /_grangs dang /_rtsis dang /_lag rtsis dang /_dbyung ba dang /_gzhug pa dang /_gzhag pa dang /_'byed pa dang /_klog pa'i 
pha rol du son cing /_de'i tshe na bram ze'i spyod tshul dang /_spyod pa dang /_gtsang sbra dang /_kun tu spyod pa dang /_thal ba blang ba dang /_bya ma bum blang ba dang /_sa blang ba dang /_lag stangs dang /_thor tshugs dang /_rab bsngags 
bya ba dang /_kye zhes bya ba dang /_nges brjod kyi rig byed dang /_mchod sbyin gyi rig byed dang /_snyan tshig gi rig byed dang /_srid srung gi rig byed dang /_bram ze'i las drug po mchod sbyin byed pa dang /_mchod sbyin byed du 'jug 
pa dang /_klog pa dang /_klog tu 'jug pa dang /_sbyin pa dang /_len pa la mkhas pa'i bram ze rig byed dang rig byed kyi yan lag gi pha rol du son pa/_me lta bu'i shes pas rang gi smra ba gsal bar byed pa/
gzhan gyi smra ba tshar gcod nus par gyur to/_/des phas rig pa'i gnas thams cad slob du bcug nas des lo brgyad gnyis kyis dbang po'i brda sprod pa blags nas rgol ba thams cad tshar bcad par gyur 
to/_/de dus gzhan zhig na pha dang lhan cig rig byed 'don par byed pa na smras pa/_yab smras pa 'di'i don ci lags/_bu kho bos kyang smras pa 'di'i don mi shes te/[ ]'di ltar gsang tshig gi gzhi 'di dag ni sngon 
gyi drang srong rnams kyis bstod pa bsgrags pa yang dag par sbyar ba ste/_de dag ni da ltar bram ze rnams kyang rjes su sgrogs shing rjes su brjod par byed do/_/yab gsang tshig gi gzhi sngon gyi drang srong de rnams 
kyis bstod pa bsgrags pa yang dag par sbyar ba gang dag da ltar bram ze rnams rjes su sgrogs shing rjes su rjod pa de dag don ma mchis lags snyam 'am/_ci 'di ltar smras pa 'di'i don ni 'di lags so/_/
smras pa/_'di'i don ni 'di lags so/_/bram ze skar rgyal yid dga' zhing yid dga' nas bsams pa/_bus bya ba ni 'di lta ste/_pha'i gzhung srongs par bya ba 'am/_khyad par lhag par rtogs par bya ba 
de tsam du zad na bram ze'i khye'u 'dis ni bdag pas khyad par lhag par rtogs so snyam nas/_de bram ze'i khye'u lnga brgya tsam bram ze'i gsang tshig dag klog tu 'jug pa de dag kyang des yid dga' zhing 
dga' bas de nyid la gtad do/_/bram ze'i khye'u nye rgyal bram ze'i khye'u lnga brgya tsam bram ze'i gsang tshig dag klog tu 'jug pa na des rig byed ring po ring po gang dag yin pa de dag ni thung ngur rnam par